കൊച്ചി: പിണറായി വിജയനെ ലക്ഷ്യം വച്ചുകൊണ്ട് സിപിഐഎമ്മിനെ തകർക്കുക എന്ന ബിജെപി നീക്കത്തെ മുഖ്യമന്ത്രി വി ഡി സതീശൻ പിന്തുണയ്ക്കുന്നവെന്ന് സിപിഐഎം സംസ്ഥാന സെക്രട്ടറി എം വി ഗോവിന്ദൻ. അതിൽ ഞങ്ങൾക്ക് ഭയമില്ലെന്നും എം വി ഗോവിന്ദൻ വ്യക്തമാക്കി. 'കേരളത്തിൻ്റെ മുഖ്യമന്ത്രി വി ഡി സതീശൻ പറയുന്നത് നിയമപരമായി കേസെടുക്കാനാവില്ലെന്നാണ്. ഇ ഡി പൊലീസിന് കത്ത് നൽകിയിട്ടും പഞ്ചാബും തമിഴ്നാടും ഉൾപ്പെടെയുള്ള സംസ്ഥാനങ്ങൾ ആ കത്ത് മുഖവിലയ്ക്കെടുത്ത് കേസെടുത്തിട്ടില്ല. അത്തരം നിലപാട് സ്വീകരിക്കാൻ സംസ്ഥാന സർക്കാരിന് അവകാശമുണ്ട്. കേരളത്തിൻ്റെ മുൻമുഖ്യമന്ത്രിയെ ഉന്നംവെച്ച് പാർട്ടിയെ തകർക്കുക എന്ന ലക്ഷ്യത്തോടെ ബിജെപിയുടെ ഭാഗമായി നിന്ന് ഇ‍ഡി നടത്തുന്ന നീക്കത്തെ വി ഡി സതീശൻ സർക്കാർ അംഗീകരിക്കുന്നത് അങ്ങേയറ്റത്തെ കമ്മ്യൂണിസ്റ്റ് വിരുദ്ധതയുടെ നിലപാടാണ്' എന്നും എം വി ഗോവിന്ദൻ വ്യക്തമാക്കി.
വിമാനത്തിൽ പോകുന്നതിന് തങ്ങൾ എതിരാണെന്നും എന്നാൽ വി ഡി സതീശന് വിമാനം സ്പോൺസർ ചെയ്യുന്നതാരാണ് എന്നും എം വി ഗോവിന്ദൻ ചോദിച്ചു. മാധ്യമങ്ങൾ ഈ ചോദ്യം ചോദിക്കുമ്പോൾ പത്രപ്രവർത്തകരെ ചീത്ത പറഞ്ഞ് മുഖ്യമന്ത്രി ഇറങ്ങിപ്പോകുകയാണെന്നും എം വി ഗോവിന്ദൻ ചൂണ്ടിക്കാണിച്ചു. മന്ത്രിമാരുടെ യാത്രകളും സ്പോൺസർഷിപ്പിലാണ്. ഇത് ഭരണഘടനാ വിരുദ്ധവും സത്യപ്രതിജ്ഞാന ലംഘനവും ആണെന്നും എം വി ഗോവിന്ദൻ കുറ്റപ്പെടുത്തി. ആറുകോടിയുടെ കാറിൽ പോയാലേ ഷാജിക്ക് ഉറക്കം വരൂ. സ്പോൺസേർഡ് സംസ്ഥാനമായി കേരളം മാറിയെന്നും സ്പോൺസേർഡ് മുഖ്യമന്ത്രിയായി വിഡി സതീശൻ മാറിയെന്നും എം വി ഗോവിന്ദൻ കൂട്ടിച്ചേർത്തു. മുഖ്യമന്ത്രി ഇങ്ങനെയായാൽ ഉദ്യോഗസ്ഥർ എങ്ങനെയാകും എന്നും എം വി ഗോവിന്ദൻ പരിഹസിച്ചു. കൊച്ചിയിൽ കാണാൻ പോയ നിക്ഷേപകനാരാണെന്നും രാവിലെ മുതൽ രാത്രി വരെ കളവ് പറയുന്ന മുഖ്യമന്ത്രി കോൺഗ്രസിന് ഉൾപ്പെടെ എല്ലാവർക്കും അപമാനമാണെന്നും സിപിഐഎം സംസ്ഥാന സെക്രട്ടറി പറഞ്ഞു.
'ത്രിപുരയിൽ സിപിഐഎം തേറ്റ് ബിജെപി ഭരണത്തിൽ വന്നപ്പോൾ പ്രത്യയശാസ്ത്രപരമായ വിജയമാണ് നേടിയതെന്നും യു പി ജയിക്കുന്നതിലും പ്രധാനമായി കാണുന്നത് ത്രിപുരയിലെ വിജയമാണ് എന്നായിരുന്നു നരേന്ദ്ര മോദിയും അമിത് ഷായും പഞ്ഞതത്. പ്രത്യയശാസ്ത്ര യുദ്ധത്തിൽ ബിജെപി ജയിച്ചിരിക്കുന്നു എന്നായിരുന്നു ഇവരുടെ അവകാശവാദം. ഇനി ലക്ഷ്യം കേരളമാണ് എന്ന് വർഷങ്ങൾക്ക് മുമ്പ് മോദിയും അമിത് ഷായും പ്രഖ്യാപിച്ചിരുന്നു. അതിൻ്റെ ഭാഗമായുള്ള ബിജെപിയുടെ അതിശക്തമായ കടന്നാക്രമണമാണ് ഇപ്പോൾ നടന്നുകൊണ്ടിരിക്കുന്നതെന്നും' എം വി ഗോവിന്ദൻ വ്യക്തമാക്കി.
ലോകത്തെ ഏറ്റവും വലിയ സമ്പന്നരായി അദാനിയെയും അംബാനിയെയും മാറ്റുക എന്നതാണ് നരേന്ദ്ര മോദിയുടെ ലക്ഷ്യമെന്നും എം വി ഗോവിന്ദൻ കുറ്റപ്പെടുത്തി. ഈ കുത്തകകളുടെ കയ്യിൽ നിന്നും ലഭിക്കുന്ന കോടാനുകോടി രൂപ ഉപയോഗിച്ചാണ് കേരളം ഉൾപ്പെടെയുള്ള സംസ്ഥാനങ്ങളിൽ ഇടതുപക്ഷത്തെ തകർക്കാൻ ബിജെപി ശ്രമിക്കുന്നത്. പണക്കൊഴുപ്പ് കൊണ്ട് ആർഎസ്എസിനെയും ബിജെപിയെയും നേരിടാൻ ഞങ്ങൾക്കാവില്ല. ജനങ്ങളാണ് ഞങ്ങളുടെ കരുത്ത്. ജനങ്ങളെ അടിസ്ഥാനപ്പെടുത്തി മാത്രമേ സിപിഐഎമ്മിന് മുന്നോട്ട് പോകാൻ സാധിക്കുകയുള്ളു. അവരെ വിശ്വാസത്തിലെടുത്ത് കൊണ്ട് അവരെ അണിചേർത്ത് കൊണ്ട് ഈ തെറ്റായ പ്രവണതകൾക്കെതിരെ ശക്തമായ പ്രതിരോധം ചേർത്ത് മുന്നോട്ട് പോകുമെന്നും എം വി ഗോവിന്ദൻ വ്യക്തമാക്കി.
Content Highlights: CPI(M) leader M V Govindan criticises the Kerala Chief Minister, alleging that his statements throughout the day are an embarrassment to everyone, including the Congress.